​Kundesenteret på Jernbanetorget 30 år

Den 20. januar 2018 er det 30 år sidan Servicesenteret for kollektivtrafikken opna på Jernbanetorget i Oslo.

Året var 1988 og namnet var Trafikanten. Før etablering av senteret var det eit mindre billettsal samt opplysingskontor lokalisert i Kirkeristen – dagens Cafe Bacchus. Lokalet i Kirkeristen vart etter kvart lite eigna til å takle den store kundepågangen og dei store aktørane i kollektivtrafikken den gongen gjekk saman om å etablere eit nytt selskap i nye lokale under tårnet på Jernbanetorget.

Kø: Fornying av månadskort skapte store køer ved slutten av kvar månad fordi korta gjaldt for ein kalendermånad. Foto: Arne Danielsen.

Opning av servicesenteret vart ein suksess frå første stund. Pågangen nådde seinare sin absolutte topp med 140 000 fysiske besøk på ein månad. I tillegg til at kundebehandlarane fekk ein langt betre arbeidsplass, vart også rammene for kundeoppleving markant oppgradert. Bransjen fokuserte no på service! Oppgåvene til senteret var i hovudsak reiseinformasjon, billettsal og tilgrensande serviceoppgåver. I tillegg til det store skrankeområdet med kaffebar, var det ringesenter og romsleg møtelokale i bygget.

Utfordringar: I utgangspunktet fekk arkitekten ei hard nøtt å knekke med råbygget som var plassert under drosjehaldeplassen ved Oslo S. Foto: Trafikanten

Lokalet hadde svært lite naturleg dagslys. Arkitekt Jürgen Kiehl greidde likevel å omskape ein mørk «bunker» til eit attraktivt senter med kreativ bruk av lys, speil i himlingar, element av stål og bøk i sirklar og runde former.

Ruter og Trafikanten fusjonerte i 2014 og Servicesenteret fekk namnet Ruters kundesenter. Kundesenteret vart i desember 2017 inntil vidare flytta til Oslo S på grunn av vasslekkasjar. Senteret blir no renovert.